I u Velom Lošinju odlučili su da maškare ne mogu proći, a da se ne održi barem najosnovnije - čitanje testamenta i paljenje pusta - tog tradicionalnog krivca za sve ono loše što se dogodilo u mjestu u proteklih godinu dana...
Evo kako se pred kamerom od pusta oprostio dugogodišnji voditelj veloselskog karnevala Nedjeljko Baričević:
U ovoj godini pandemije, potresa i skandala,
dočekali smo i dan karnevala.
Doduše, kako danas ništa normalno nije
ni karneval nije kako prije
Ali kako oćemo spasit užancu
Morat ćemo, puče, držati distancu.
Iako će ove godine karneval imati jednu manu,
moći ćete ga vidjeti samo na ekranu.
Otili smo poć vanka i sve smo parićali
ali su nas ovoga puta epidemiolozi fermali.
Malo smo falili, morali smo učinit jedan kambijament
i zvat Capaka da pročita testament.
A nadležna služba bi nam siguro dozvolu dala,
da smo rekli da imamo misu za karnevala.
A to je tako dokle god smo živi,
uvijek su nam drugi za nešto krivi!
Valjda to tako mora bit,
zato će na kraju karneval za sve platit!
Od lani se kod nas puno toga dogodilo,
ali se malo toga promijenilo.
Izbori su pasali, a niš nisu kambjali.
Ki su gore bili, ti su i ostali
Vol dir da našemu narodu niš ne fali.
Ipak, nešto je obilježilo izbore ove -
pojavile su se nike stranke nove.
Doduše, nekih smo već i otprije znali,
sada su samo košulju kambjali.
Tude je sada glavna fora
nova stranka Miroslava Škora.
Če je upućen mislil da će kambjat,
bolje mu je bilo da je ostal kantat,
a ne se va politiku pačat.
Pa je tude Pametno, Možemo ili ki zna koja sve lista,
ma svima je na pameti stvar ista.
Kakova god, puče, da nas ćapa bura,
njihova plaća je uvijek sigura.
A narod glasa, pa kako bilo,
vidili ste če se i s Trumpom dogodilo.
Iako se ovde sve znalo,
istešo mu je toliko milijuni ljudi glasovi dalo
Ma če ni i kod nas stešo sve?
Svi sve znaju i opet glasaju za HDZ.
Ma če mislite, puče moj mili,
da su na vlasti i ovi drugi, da bi boji bili?
Svi su isteši kad se vlasti ćapaju,
za obični narod puno ne haju.
Ma moram uvde čegod napisat sada,
kako naša Vlada vlada.
Ali moramo priznat da nemaju sreće,
če im se još va mandatu dogodit neće?
Potresi, pandemije i sto problema,
svi bi šoldi, a šoldi nema.
Doduše, hvale se da su milijarde pomoći dali,
ma koliko god dali, moj puče, uvik fali.
A ja ću im uvde reć kako malo šoldi šparenjat,
zakon o minimalnoj plaći okuri kambjat!
(...) Mi puče mogli naći, da donesu zakon o maksimalnoj plaći!
Pa kad bi se tim lupežima i deset mijari dalo,
stotine milijuni na godišće bi se šparenjalo.
A i to bi moglo previše bit,
pa sirotinja mora s tri puta manje živit.
A Vlada kako da nema drugih problema,
okolo stožera je nastalo puno dilema.
A naš narod da ti pamet stane
- najveći su problem zatvoreni kafići i teretane.
Za teretane ne znan i briga me nije,
ma vidim da je boje kada ne delaju oštarije!
Doduše, sad su malo mjere popustili
i da počnu delat su ih pustili.
Pa opet nisu kuntenti, ja to znan,
aš da se ne more živit od kafe za van.
Ma če su bili zatvoreni, neće im niš bit,
i tako su uvik mogli malo boje od drugih živit!
Aš korona i nama drugima ne da mira,
zato pustimo struku da s tim dirigira.
Doduše, zadnje vrime ih stalno kritikaju
i za njihove mjere puno ne haju.
Ma neka govori če koga voja,
ali situacija nam je zadnje vrime malo boja.
A sada bi svi nešto delat otili,
kamo su, puče, prije korone bili?
Zač nisu, kad su šoldi imali,
malo i za nedajbože na bandu klali?
Nego su svi živili na visokoj nozi,
a sada državo i Vlado pomozi!
A kada se svašta uvde spominjalo već,
moram i o virusu dvi besede reć,
britanski, brazilski, afrički i ko zna koji,
sreća i bog da balkanski ne postoji!
Ma ta beštijica se, puče, i dalje ne predaje,
jedino nam cjepivo malo nade dalje.
Ali kako nam vrah mira ne da,
odmah afera oko cijepljenja preko reda.
Očito ti kondoti svoj život jako volu,
čak se i Slavko Linić našal u tom kolu!
Sad ih prozivaju i da će ih kaznit govoru,
a ja mislim da im samo puhat moru.
Ako se realno stvar pogleda
i političari su se cijepili preko reda,
ma nemojmo, puče, njih dirat,
oni su samo otili cjepivo reklamirat!
Ma moramo se ufat da će sve dobro bit
i da će sve na svoje mjesto prit.
A sada će sve na mjesto stavit, ako niste znali,
oni suci ki su s Kerumom kantali.
Ja ne znam zač okolo toga sad svi kokodaču,
če ni boje da kantaju nego da plaču?
Aš puče moj, pravo ti budi, i suci su samo ljudi.
Znam da sve ovo ni lipo i da morate znat,
ma novinari bi mogli kadegod i o ljepčim stvarima pisat,
a oni jedva čekaju ko će ki krivi korak napravit,
da bi ga mogli odmah na križ stavit!
Ne treba svaka stvar afera bit,
lepče vijesti u prvi plan stavit,
pa će narod kuntentiji bit.
I o lokalnim izborima moram reći neku,
aš borba za fotelju je već u punom jeku.
Svi nešto obećavaju i nude,
na kraju zna se šta od toga bude,
ne ufaj se, puče, ništa bolje biti neće,
aš va tome kolu se uvijek isti krug ljudi okreće.
A kad sam već dotakal našu Vladu,
moran reć če se dela i u našem Gradu.
A tamo već i ptice pjevaju sa grane,
mućke, malverzacije i trapule na sve strane.
Svako godišće sve veći kažin,
ne zna se, puče, ki muti s kim.
Najveće su, puče, udelali sranje,
kad su rasprodali atraktivne kampanje.
Ako se pitate kade su te kampanje bile,
pogledajte Ćunsko polje i Kurile!
Moral si imet kumpara oli va pravoj stranci bit,
i onda si mogal za malo šoldi kampanju kupit.
Pa sad ograde od dva metra i kućice posvuda,
još malo pa se neće moć ni pasat onuda!
Šta li će od toga tamo na kraju prit,
živi bili puče pa ćemo vi't.
I stambena lista - još jedna tema,
okolo toga je uvik bilo problema.
I ne treba ti, puče moj, za to radar,
svaki ki priko reda stan dobije je deficitarni kadar.
Pa tako tu ulete zermani, kumovi i od kuma kćerka,
a stan je navodno dobila i jedna frizerka!
Znam ja puče da svi moraju živit,
ma kada će običan smrtnik tako na red prit?
A neki dan su, ako niste znali,
ugovor za put do Mrtvaške potpisali.
Investicija je, puče, to, moj, vela,
znamo za koga se sve to dela.
Aš da je to nika dobra lokacija bila,
još Austro-Ugarska bi ono odavno učinila!
U redu je postojeću cestu malo načinit,
ma ne okuri onde autoput učinit!
Aš neki su unde, moj puče mili,
i bez puta već kažin učinili.
Pa moram ovde spomenut kroz niku strofu
i pravu veloselsku katastrofu.
Nama ne okuri potres da nas spraši,
za to se pobrinu lošinjski bogataši.
S druge su bande škoja pokupovali imanje
pa su od tog odmah napravili sranje.
To moj puče morate vi't,
svaki do svoje parcele oće z autom prić!
Za to rušu sve redom i ni im žal,
pitam se ki im je za to dozvolu dal?
Za nikakovu lipotu oni ne haju
i bez problema i priko privatnoga pasaju.
Pozivam mjesni odbor da nešto napravi
i digne na noge nadležne inspekcije
da se to zaustavi!
Mora se uvde reć, a da se ne laže,
kako nan izgledaju naše plaže.
Sramota je to, moj puče, vi't,
još malo nećeš imat kamo noge umočit.
Na sve strane škovace i nagazne mine,
naših turistički djelatnici to nimalo ne brine.
Plaće velike, korona, posla nema,
mogli su se ćapat i tog problema!
Ma, to su, puče moj, velike face,
če, ćeš da oni idu kupit škovace?
Podivljale ovce lutaju po selu
i delaju ljudima štetu velu.
Ako budemo otili nešto sadit,
morat ćemo okolo dva metra žice imit.
A u zakonu jasno piše,
ako blago gospodara nema,
Grad mora preuzet rješenje tog problema!
Ovce, koze, svinje i čujem da i jelena već ima,
kako to riješit - našu vlast ne zanima.
Otili mi to priznat ili ne otili,
ali Ulicu Vladimira Nazora su lipo načinili.
Sada, da sa tin poslom dalje gredu
i da su nike druge kale sad na redu.
Aš kad ih sve lipo finu načinjat,
e, onda će ih sve lipo raskopat.
Aš to je, puče, stvar znana,
sve se dela bez pravog plana.
To je, puče, onda problem pravi,
uvik se nešto šoto stavit zaboravi.
Aš naša vlast se još nije arivala naučit,
sve šoto parićat pa posle masno naplatit.
Još čujem za jedan problem va mestu,
spod Čačićevih stanova da oće učinit cestu.
Tude su istešo jako pametni bili,
ako je cesta trebala bit,
zač je nisu šubito učinili?
A što je već odavno znano,
da su tereni za gradnju tamo.
Pa sad kad bi trebala tamo gradnja bit,
sranje ako ne moreš z auton prit.
Siguro ni jedni ni drugi neće lako pustit,
šta će se desit, živi bili, pa ćemo vi't.
Ima još puno problema o kima bi pisal,
ma onda do jutra ne bi fermal,
A da se svi problemi riješe, šansa je mala,
pa mora nešto ostat i za dogodine materijala.
I dok završavam ovaj testament,
do mene je došla informacija,
da smo po koroni u državi prva destinacija.
Zato, čuvaj se, puče, nije to šala,
bit će u životu još karnevala.
Na kraju, nema ovo godišće ni EPP mali,
aš nema ni tanca u kinosali!
Zato samo pozdrav, puče moj mili,
zdravi i veseli bili!
Vaš karneval Kovid