I ovo se ni od mala dogodilo,
da se po selu ni hodilo.
Tako je pasual i Veli pijeti i karnevaual,
aš da nas je tobože daš fermual.
Nanke pusta nismo prepejali
I nanke malo zafrajali.
Bitno da se užuanca vaja darži,
ma za svaku smo škužu dobri.
2013. je komaj pasala,
lijepe trenutke nan je dala.
Judi na čestu je stirala,
aš je referendum, štrajk i otkaz osigurala.
A 2014. se još huja pokazala,
vjerujte nije to šala.
Silne milijune v karsele je spuhala
i firme samatala.
Od kada smo v Europu entrali,
mesto smo na Mediteranu osigurali.
Nismo više brđani sa Balkana,
već važna destinacija Europljana
Obrtnici! A kede su van šoldi finili?!
Forši v Afrike na safari se stratili.
Kokodrila, lava i slona ćapat,
neka se Nadan more malo šfogat.
Crkveni tereni su van kako babuška,
u njima vavek nešto šuška.
Uvijek velika tajna neka,
a iznenađenje nas unutra čeka.
Golf-teren nan ima kapitat,
i puol Punte zravnat.
Elitna destinacija ćemo diventat,
a prasci će ju njin škuje za balice zrovat.
Posložili smo kockice
i prodali parcelice.
Udelali jedan veliki Lego
i pokupili šoldi, a nego?!
Ma su se miništri javili
i svuoj dijel pretijendili.
I opet smo se fregali
i Ruson se pokazali.
Vaja pazimo če ćemo pisat,
aš bimo mogli bez kunice ustat.
Zato turizam nijećemo tikat,
aš kako onda manifestacije organizat.
I naša Nautika s ku smo se hvalili,
aš su njijevini kapituani po svetu hodili.
A sada bipa, bipa, bip,
tukat će nas onde WC-papir kupit.
Mi v Nerezinah smo van uvijek in,
aš se držimo u korak sa svim.
Bitno da smo se modijerni pokazali,
i jedini na ižule protiv votali.
Kaj je s marinom? Kaj je s marinom?
Jena je na butige, druga v tisku, treta na ažilu,a nekoliko ih je doma.
Ma če vavek moramo pasat per mona?!
I egzotiku smo v Nerezinah dobili,
aš su režidencu učinili.
Veli turizam prontuju
i palme sajuju.
Novu makinu smo v paizu kupili.
ma malo ula smo učinili.
Pak su sve barzo zatvorili
i judi z maslinami na laštiku pustili.
Za drugo leto bimo mogli i poštu zatvorit.
Neka se još jena slastičarna more v mestu otvorit.
Cirka tako će i bit,
aš već okuri po poštu v Lošinj hodit.
I Karlićeva sada more na miru srat.
Tubi će žuntat i čestu ašfaltat.
Ma su se opet Cresani pokazali,
i novi ašfalt više puti kopali.
A Anicu će ju žbalcat,
aš će druga mlaja kapitat.
Perfin će je z Bombaja jidra ordinat,
da bi se šetijembra mej druge mogla pokazat.
I to će barzo prit,
vit ćemo če će bit.
Dobri smo za se na televizije hvalit,
i pak onda inkuluadu od drugih dobit.
Pusni utori nan je kako i država,
jena vela krepana krava.
Svi smo u velikom klincu,
ma tješimo se barzo ćemo pojest pincu.
Dragi judi svi,
drugo leto za karnevual mislite vi.
Forši se neki mona najde
i opet suan udela sve.
Kuel ke košta, košta,
za sigoda bi bilo dosta.
Ala Fredi neka nan zasviri,
homo f kolo far due jiri!
