S likovima Mare i Anice, održan je igrokaz uoči paljenja pusta, na "pusni utori", posljednji dan karnevala u Cresu.
Prije toga, na rivi su se predstavile creske maškare, naročito one s temom kostima "Pepejuhe", koja je predstavljala Karnevalsku udrugu "Vežgani" u prekjučerašnjoj karnevalskoj povorci u Rijeci.
A evo i što su to prokomentirale Mare i Anica...
Mare: Ala Ana, homo se posest ovdeka. Imamo boji hlad nego va Šumice.
Anica: Mare, Mare, samo nas je dve. Kede je treta?
Mare: Da, da, zovi još i Kate, ma nemoj i Pepu, aš ne moremo stat nas cetiri ovdeka va red.
Anica: Ej Mare, ce je novega?
Mare: Ej lipa moja! A ce ja znan, sila novih štoriji sen cula!
Anica: Kakovih?
Mare: Ne znan do kuda pocet! Kako ti se para ova nova prezidentica do turističkog?
Anica: A nisen vero zes nju ćakulala, ma je sila pohvala za nj! Vero da je prava. Viš Semenj kako je bil lepi ovo leto!
Mare: Da, moram pohvalit tu malu! I advent je vero lep bil, kako da je Cres probudila s onom Vatrom. Do kuda je ona prišla?
Anica: Ma kakova Vatra?? Ce je neš zapalila? Mene se para da je do Opatiji prišla!
Mare: Ma Ane, to ti je poznati bend kul nas. Niš ne znaš! Ce paraš da je cesagod kumbinala, pa su je stirali do tan?
Anica: A ce ja znan, forši da je, a forši bude dobra. Kol nas va zadnje vreme samo furešte delaju, kako da domaci judi ne znaju delat.
Mare: Bog joj da sreći, neka udela cesagod za ovoh naš Cherso.
Anica: Jušto tako, lepo si rekla.
Mare: Hebaj, ćeš poć na maškari?
Anica: Ce ni to po letu? Zadnji put je bilo na šesti mesec, oli sedmi, nisen vero sikura sada! Ja sen se već prontala za leto, kupila brageši kratke za karneval!
Mare: Ma neeee, to su maškari prošlo leto rekli da je zbog koroni bilo odgođeno za leto, ma ja paran da su se oni zgubili svi. Oni ne znaju ki im glavu nosi!
Anica: Hahaha dobro si rekla! A ce ćeš, mladi ne bacilaju niš! Kede su oni naši stari kada se jušto znalo kada je ce! Ni korona njih ne bi šakramentala va ideji.
Mare: Istina, Ane, ni to više to. Ti mladi niš nece delat, samo znaju zapovedat! Eko!
Anica: Si videla istešo ovo leto?! Sve neke "fiskulture" moraju delat na povorci. Kako vreme je prišlo, maja moja. Više ti ne daju ni popit, se mora bit ko po špagi. Ne moreš ni hodit levo-desno.
Mare: Ane, ma ni ti niš ne kapiš. San cula da nanke pet judi ne dela karneval. Anke ova do Gradskog vijeća je šla ća do Cresa kako i ona ka pere vlasi. Ni karneval više ce je bil, kada su se svi maškarali, tempi pasati. Sada je novo vreme. Moreš prihvatit ili ne moreš, ali moramo podržat mlade! Oni su budućnost naša!
Anica: Ma Mare, kakove mlade, kakova budućnost? Reci mi, kede su ti mladi judi? Više ni ne znaju ce je to karneval. Ne znaju ce bi delali 'vako 'nako. Samo bi slušali, kako ono receju, cajke!
Mare: Ala fermaj više s tim mladima. Ionako delaju ce će. Nisi ni ti boja bila!
Anica: E, ma bila sen scera hodit do Gavzi, lepa arija je bila, pa je šteta stat kući! Ma ce si klaverna, prasec mi je prišel zbandi mene, tamo kol Kekića, kede vozi one barki. Ma to ni više fidano za poć šetat.
Mare: Sen cula da su kakove akcije delali, da će ih ubit sve! Je, vraga tombanoga će ubit, kada prasca je više nego komarci! Ce je vo prišlo kol nas, maja moja! Brižni naši janjci. Će sve krepat!
Anica: Lepo ćemo imat kamp, naselje Slovenaca, naselje prasci... Jušto lepo! Dobrodošle drage beštije!
Mare: To ti kamp napuštu dela! Neće platit portire, pa nam prasci cuvaju kamp, kako ne kapiš! Ni miga to slučajno!
Anica: Zaštitarska služba "Prasec"!
Mare: A moraš se snać, u vakova teška vremena, vaja gjedat svaki cent.
Anica: Ben, ma ce će bit tamo kede je Dalmacija bila? Tan je sve neš novo!
Mare: A ce ja znan, nekakovi hotel, motel, ki će ga znat!?
Anica: Ja, da ne bude kako i Vila... Kako se zove prokjeta? Tan kol cevjene lanterni!
Mare: Rivijera!
Anica: E, e ta! Vila, luksuz, van, tan, a nuter spiju ovi do baušteli! I ni maj delano niš nuter! Ni tu sila pameti do vlasnici!
Mare: A ovi do Kimena su se tek sad modernizirali, će delat wellness nakon sto let!
Anica: A oštija, ćemo poć na masaže, aš ovaj moj doma ni za niš, nanke za to!
Mare: A oson Vili do Gavzi?
Anica: Ma ke Vili?
Mare: Da će se gradit, ja paran sedon ili oson vil od kampa do Gavzi.
Anica: Ma ce si klaverna? Lepo će i koncesiju na plaži svaka dobit, pa ćeš poć plavat na Pišarjolu. Lepo su to kumbinali.
Mare: Ne moreš ti protiv velih.
Anica: Ma ce ne moreš, vaja se pobunit!
Mare: Ma ne budi mona, nima pravdi!
Anica: Cekaj me tu, ren smeti hitit!
Mare: Ma ce sve hitaš va isti koš?
Anica: Sikuro! Ce bin morala osomnajst vreći imet za hitat?
Mare: Ko te snimi kamera - onoh mali, će ti prit kazna doma! Znaš da moraju napunit proračun do državi.
Anica: A ben, ću se maškarat za poć smeti hitit! Onda me neće niki prepoznat! Pa nek snima!
Mare: Ma vero lepo govoriš! Staviš jenu beritu, šjarpu i očale i neka on snima! More anke i istragu pokrenut. Si videla kako su zbog smeti finili na televizije?
Anica: San san. To su ti Mare, mutna posla. Kako jeden kamp more manje placat od mene. Ala, kako??
Mare: Ce ja znan, onaj višak su si morda va takuin stavili. Boje krast od malog nego od velog!
Anica: Ma dobro, pus' sada smeti! Sen cula jenu lepu stvar do Grada! Da ce dat neke kući svoje mladima, neka urede i neka žive tan!
Mare: Ma ke kući? Do Grada? jušto tako, na lepe oci?
Anica: Aaa neki dobiju jušto tako, ali neki moraju platit, ali im Grad daje krov nad glavom!
Mare: A ki mladi?? Pre dobiju stan ovi furešti nego domaći judi. Ovoh naš je u Irskoj, onoh je u Njemačkoj, onoh treti je va Holandije... Ki mladi?? Ti mladi bit će da su ovi Nepalci, ki su prišli ovdeka delat za 4 eura! Bit će to Vila Rivijera, treti nastavak!
Anica: Da, anke su delali konfužjon va vrtiću. Cemo udelat ugovor s pečatom da pop more prit blagoslovit decu?
Mare: Ma kan je šal ovoh svet, više niš ni sveto!
Anica: A onoh do Elektrovodi diretor?
Mare: A on je pobjegal do dugova va konkurentsku firmu. Viš da mu je lakše fasadu delat va općine.
Anica: A sada smo dobili jenog mladog, onoh s trokolicom ki peja drva po kucama, tako sen cula. A cekaj, onoh policijoto ki dela stanove? Ce se zna cesagod?
Mare: Ce se tu ima znat? Sada se svi kape va gradnju, ne moraš ni skulu imet. Ane, ala homo i mi gradit kucu, ma smo šempije.
Anica: Vero smo, da!
Mare: Viš da anke mala do županice je šla Ameriku! Još ju ni uvalila nigdere va Cresu, pa ju je poslala tan, forši tan ima neke vezi, vrah će znat!
Anica: Mali je riješen! Ma je ingordi! Ni mu dosta škver! Sada bi i celu "Cresanku" zel! Kako ide ona, ki ti ponudi prst, a ti mu zemeš ruku! Zes Stevicom van, zes Stevicom tan! Oštija madona, koliko kafa popiju na dan!
Mare: Eeeee cekaj cekaj, ce mu još i mutandi držat, svako kafe diže postotak šansi za ćapat se!
Anica: A ovi do Volnika, ce delaju? Ce se nisu speštali nec?
Mare: Ma su, su. Ne bacilam ja za njih, neće sikuro poć kopat! Jeden će imet Cres Istok, drugi Cres Zapad!
Anica: A onom tretom ni ostalo niš. Od vele dinastiji sada su jedna vela nula. A i da imaju ce, vero ne znan kako bi to podelili.
Mare: A viš, tako ti je to. Se su zaperli, anke i pekaru. Sada nimaš gdje ni kruh kupit.
Anica: Maja moja, niš nisan spravila za obed, homo mi kupit jedan burek kol Mlinara.
Mare: Ma koji Mlinar, tan ni struje ni. Forši do novoga leta ćeš imati sreće.
Anica: A niš, moj Frane je od daneska na dijeti!
Mare: Ma kako ce delat one vježbi ko ne jede?
Anica: Ma ce? Koji Frane? Govorin za moga Frana!
Mare: Aaa, sen krivo kapila. Onom drugom je vetrina pelna medaji.
Anica: Ovoh moj ne more dobit medaju nanke za spat!
Mare: Viš kako je to Ane moja, neki judi bi malo delali, malo ne bi delali, a neki hoće i delat. Tan va Šumice da se cuda događaju.
Anica: Cuda? Vero si to dobro rekla. Tan su preko noći udelali jezero, sada da napaja celo Jadransko more.
Mare: Sam videla. Deboto san se tombala jeden dan s bičikletom do onih cijevi.
Anica: Ne znan kako ce ti se to promenit, aš ona tan na fejsu brine samo za glavu do ribe, a ne za tvoju glavu.
Mare: Bitno da su nan borovi svi na mestu - naše tradicionalno bilje.
Anica: Mona, pa to su ti sve tombali dole!
Mare: Jooj, sen videla na fejsu da oni furešti žele Šumicu više nego domaći judi, tako da moreju prit gjedat ženski, za mis.
Anica: Da, forši ih pere nostalgija za borove koje su oni posadili. Će moć prit kada pride novi hotel, toćat jenu nogu va bazen, a drugu va more, pa onda im ti borići neće falit.
Mare: Forši će storit neke nove uspomeni.
Anica: A si videla onu vilu ka se operla? Kako se zove? Salvia?
Mare: Ooo san, san. To da je bil jeden ekstravagantan događaj. Bil je i onoh Lupino, kako se zove... Ne znan ce je tamo delal.
Anica: Maja moja, to je onoh ki slika gole ženi, maja moja, ke škifo mi dela!
Mare: Tebi je sve škifo, nisi moderna nanke malo! Ma znas ce, homo se mi vratit na pocetak. Tan va grupi do ovih Vežganih se digla vela halabuka, ja ne znan ce to je.
Anica: Maja moja, da, celi grad ćakula o tome. Cula sam da su tamo v Reke svi bili kako va vojsci. Ona tan da je vikala samo tri va red tri va red. Nisi smel pogrešit koraki, aš bi šal venka reda pa su matere vikale da se vrate va red. Ma je nastal veli konfužjon!
Mare: Ma kakov red, ni to bilo nikakovog reda. San gjedala na televizije. Ona do Gonza se skoro zvrnula s onon karocom s decami!
Anica: Viš, kako lepo. Tako treba ucit decu da od malena hodiju na maškare, a ne samo gjedat na fejsu ce ima i komentirat.
Mare: Ane moja, mi se para da su skoro glave pale. Ce bit novi izbori va Vežganih? Znaš ce, daneska ne smeš nikom niš govorit jer se sve skapi znopak. Svi samo imeju "parole, parole", ljudska prava, još malo ćemo pokrenut i za to istragu, a niki rukavi ne bi zasukal. Ne more se više vako napred.
Anica: Mare, mi se para da su svi oni, kako se rece, malo "zabrijali". Ki zna ki je kriv, ki ni. Moramo svi više delat skupa za ovoh naš Grad i maškari pa će nan svima boje bit.
Mare: Znaš ce, mi znamo da je vavek ovoh Pust kriv. Nek on lepo gre svragu i svo zlo snjin!
Mare i Anica: Ala homo ga spalit!