Pusni utori (utorak) u Cresu - premda je karnevalski program ove godine bio sveden gotovo na minimum, tradicija igrokaza na posljednji dan maškara je održana, a u fokusu su bile aktualne creske teme. Donosimo tekst skeča...
Jenoga dana Mare i Kate su šle v Reku.
- Hebaj van, kede će fermat ovoh vrah do vapora deneska? Ce ti paraš?
- A ce ja znan, homo provat ovdeka cekat, su povedali da će tuka stat kada ne bude vetra.
- Ala žo, homo, anke ja sen tako cula.
- Ma viš vraga. Obraće se. Kan re toh mona? Ma ne re valjda na drugi mul?
- A hebaj, moraš finit skulu do meteorologije, tako da ne moreš žbaljat vreme. Onda ćeš anke manje hodit.
- Maja moja ke škifo do vremena. Lumbrela mi se razbila.
- Hot s vragu i ti i lumbrela, teci ko biš arivala.
- A ren, ren, kalmaj se malo.
- Alo, vratite skalini, ima nas još!
- Eko viš, kako smo arivale...
- Je, ma vero je "Prcolinija", a sada niman ni lumbreli više, nimam maju suhu, kotulo mi se zmocilo anke... Ma boje da nisam nanke partila.
- Bom, ala, žive smo i zdrave. Ćemo poć s kurjeru.
- Kakova kurjera??! Nanke toga ni više. Jedino da provamo va oazi spasa. Tan da ima luftići i barki na napuhavanje.
- Aaaa, ce su s ovin luftići prišli i ovi čarni? Njimi je ovo sikuro oaza spasa. Ako ne njimi, onda onom velikom do građevini. Lako tako delat. Po cele dane da lupaju kako ludi, stanovi rasteju kako gljive.
- Ma ki će to kupit?? Zemeš kredit i vraća ga prapravnuk još.
- A ce ja znan, magari ovi mladi ki sklapaju međuotočke brakove, delaju decu, sada moreju nac i kede će živet.
- Aaa ma daaa ma moreju to oni kupit, ma to je "samo" 5-6 mijari euri kvadrat. Ala ne budi luda, Cres će nan se samo napelnit tajkuni.
- Ala ala mladi će se snać. Reci ti mene, ce je novega?
- A ce će bit? Karneval v Reke da će bit na leto! Maj videla!
- Na leto?? Ce su sklavrali?
- A ce ja znan, valjda de novo te mjere! Ne kapim vero pravo. Magari su misleli da ćemo udelat karneval na biču do Melija.
- Ma to ni dobro per organizacija! Tu ce rabit angažirat celu Lučku kapetaniju do cele županije! Kad se pocmu hitat more. Svi oni maškarani, pijani... Će rabit jeden Baywatch! Maja moja, ke kažin.
- A pus ih, neka budu kuntenti!
- Neka budu, neka budu... Neka budemo i mi kuntenti, su nam udelali nove Vežgane.
- Ma kakovi su, kakovi su?
- A ce ja znam, ćakulaju da su vero vero pravi…
- Maaa ja nisam to tako cula, da im je korona škuža da nisu niš udelali.
- Da da, tako je bilo i s ovon do Turističke, pa sada su rekli da parćuje.
- Ha, parćuje kako i Semenj...
- Ma mjere delaju smeh. Kako more neš bit, a neš ne? Kako? Zaš je Kaić bil, a Semenj ne? Ce je Semenj furbi do Kaića?
- A neznan, forši korona nebi prišla na Kaić aš ima straha do pelno judi. Semenj je tantola, kako bi se reklo, u debelom padu, pa tu ni judi kako nekad.
- A ne znan ce reć! Forši da si u pravu. Ti si vero inteliđente. Bit će da se z menu družiš.
- Ala boh draga, ovo je ceterta doza. Nan sikuro nece prit ta oštija.
- Dobro si rekla. Ala boh lepa moja.
- Uuu vero me šakramentalo ovo sada.
- Ce ti je hladno lepa moja? Moremo se poć steplit tamo na mađaricu. Tamo da na novo leto bude lepi oganj do kontejneri.
- Sen cula, sen. Aš tri kurijeri furešti je prišlo. Kan će poć cekat novo leto? Jacevat se? Lepo su zapalili ogenj da se steple. Ja ne vidin niš zla tu. Da se stavil jen šator na rivi, judi bi bili na teplome.
- Je, pravo govoriš. Vero niš ne misle!
- A ki će mislit? Ova mularija ka je prišla na pozicije. Ce oni znaju? Oni paraju da ko imas skulu, da mores ce ćeš! Vaja delat lepa moja, delat! Altroke diplomi! Bukun karti. To moreš drito u škovace hitit! Nama rabi šlovek ki je delal!
- Ma bom, ovoh mali je bil par leta onoh prvi do sindaka. Valjda je naucil cesagod!
- Ma je, je. Klimat zes glavu i homo na R1.
- Ma ćakulaju da ima velo uho, da zna hebat, ma ne zustaje pelno. Na jeno nuter, na drugo venka.
- A ki more, more. Si mogla anke ti poć va politiku.
- Ja? Nisen kvalificirana za muljanje.
- A lepa moja, muljanje ti je kede god se obrneš. Pogjedaj ce se dela va "Cresanke", sve neke rošadi...
- Ali magari nan je škver počel delat, sve prontuju, sve spremaju. Će nacinit neš z otim škverom, imaju mladog diretora.
- Ma ce je pravi?? Mlad ovaj, mlad onaj... Ala šu, svi znamo da je prišal preko vezi. Ma imeju oni z bandi sebe jenu iskusnu...
- Žena, majka, županija! A iskusne su one gore na kampeđu. Jena ni arivala vodit domaće, a sada će se forši naucit na fureštima.
- Ona se vero usudila sanjati...
- Anke i ovi drugi su sanjali, ali o onim skijalištima... Ma su im ga stavili, brižni snega nisu videli, jedino pijati.
- Ma da su jako kuntenti, da su se vratili pelni šoldi...
- E, a kako ti gjedaš na ovo nasipavanje plaža? Ce ni to malo previše?
- Mene to dela vero gnjus. Toliko lepih plaži imamo, bi se reklo prirodnih... A mi sve delamo za turisti. Kako da su hendikepirani pa ne znaju uć va more ko ni pesak.
- Ma pusti turisti više, mene je više strah ovoga vraga va Rusije, ce će on udelat do ovoga sveta... Sve govore da mu fali terena... Samo da ne pride moje uliki tikat!
- A ko ne bude benzini za motorke? Ala magari su ćifareliji na struju.
- Oštija, ce nisi cula? Celu plaću ću na to potrošit! Struja kušta kako svetog Petra kajgana... Sada kad ren pišat, ne palin više luče!
- A sada san i ja u strahu, maja moja, nanke ni na solarno ne moremo... Si cula ce za ono gore va Orlecu? Da su ukrali kaabeli do bakra gore kroz fineštrin, lupeži jeni...
- A da, šli su igrat boći na jog gore va Orlec, videli da nema niš i onda za dešpet pokrali sve.
- Pa ne moreju mali judi dobit sve odmah, kako ne kape? Pervo turisti, oni pušćaju šoldi!
- A ni izbori još nisu blizu...
- Ma znaš ce, samo neka oni prideju i neka se voda toci, forši nan onda ne zemeju Vranu ča. Ter imaju svoju baru. To su centopercento oni boduli udelali neka imaju još komadić zemje da finalmente postanu veći škoj.
- Ma nećemo to dat ca ne, mi imamo naših "čiju žicu" pa će ih oni stirat ća ko nam budu to zeli! Oni da su pravi, sve neke medaje su dobili...
- A su su, a jesi cula za parolu "Skupi, odvoji i hiti ga venka"?
- A ce ti je sad to?
- E mala moja, sad ćeš morat platit smeti koje hitas,... Magari ako hitaš venka, neceš morat platit...
- Ma niš im neću dat, i oni su lupeži... Ma san cula da imeju onog malog do kameri, ću mu kulo pokazat!
- Moreš ti ce ćeš, sve ti on more gjedat okolo... Ki se gde parkiral...
- A bogami ni on ni jedini ki slika...
- ...Kan se ki sakril va firmi... Se, samo ne dela ono ce treba... Ni puno boja ni ona "Elektrovoda", ma baš nam je bajna. Kako da bi partila malo napred, da bi se delalo, pa opet ne gre nikan... Para mi se da i njihov diretor bi više otel bit u firmi "do" nego da je tan.
- Ma san cula da i nema više ki delat tan... Maja moja ke kažini kol nas. Ma ti si vero pelna informaciji. Va kojoj oštariji si to se cula?
- Ma vraga oštarija, na fejsu, mene je moj Ive rekal da je tan nova obavještajna služba i da sve neke "feteteje" stavljaju. Ma ne kapim vero ce je to.
- Ma znan znan. Rekal je ovaj moj mene, da su to veli fotografi - oni ćapaju i kad ga molaš na kondutu. Jedino još nisu arivali ćapat one lupeži do rožic.
- Viš ti Puste ce si sve udelal ovo leto...
- Ma hitimo ga va more. Ce ćemo z njin. Samo nan je gerdo parnesal.
Živjele maškare, a ti Puste cekaj bolje dane, morda ovo leto dva puta budeš na palu!
- Ala boh!