Pusni utori (utorak) u Cresu nije mogao proći samo tako - bez velikih najava, dio pusnih svečanosti ipak je održan...
Evo kako su se creski karnevalisti oprostili od pusta...
Cresanke i Cresani puneštri oprite svi,
deneska će se Pustu sudit.
Ovoga leta niš ni isto,
korona nam je prišla va mesto.
Cjeposlav Papak njegovo je ime,
neka svo zlo va popel gre z njime.
Tanti turisti va grad si nam pustil,
a sve fešti si nan zabranil.
Zbog koroni za Semenj nisi nam dal voje,
ma za Kaić smo šubito bili boje.
Kada si kamp otvoril,
virus više ni bil.
Vela Gospa je pasala,
a malatija ojačala.
Teretane, dvorane, restorane... sve si zatvoril,
viš ko zlo si nam učinil.
INA i butegin su postali
novi Fortis i Burin.
Kafe više nigdere nismo pili,
a va crekve smo se sila molili.
Kada koroni nismo imeli,
pompjeri su po Cresu šećali.
A sada kada korone ima,
kontroli nigdere nima.
Kurijera nan gre jedenput na dan,
a katamaran ni van ni tan.
Nanke va Italiju po Barilu nismo mogli,
za ovu ovdeka nimamo šoldi.
Ćakulalo se po Cresu da šoldi nima,
ma su luštre saonice lampale svima.
I novi mul su iz lučke udelali,
ma za luče na mulu, šoldi nisu imeli.
Kući su pustili da rasteju kako pičurvi pokle kiše,
a cijene maj nisu bile više.
Anke muži i ženi su sila vremena va kućah stali
i niš nisu delali pa su se jeden drugoga štufali.
Vrata do ambulanti si anke zaperl,
si imel straha da biš se razbolel?
Ričeti novi... ma ki bi to razumel,
sada nam nova dotoreša samo kapi pisat mejl.
Na pet uri ćeš zgoret
i sve grehi sobun zet.
Ala boh sada do nekih novih let,
kada ćemo jeden drugoga za ruku zet
i sve lepo opeda imet!