Cres se na pusni utori (utorak) oprostio od karnevalskog razdoblja. Feštom na rivi dominirale su maske s temom "Cres na Olimpu" posvećene zlatnoj olimpijskoj medalji Igora Marenića, koji je i sam sudjelovao. Donosimo tekst "testamenta" kojim su se Cresani oprostili od ovogodišnjega pusta...
Nono spava, dumijana pored njega, bil je u "Rushu" cijelu noć, nona je na fejsbuku celi dan...
Marija (tipka): Viš ke lepu sliku do profila ima ona kćer do one Tonine ka je šla pred 25 let u Ameriku, ovu će sikuro stavit kad parti.
Tone: Ala Marija, ne budi tako jako becala po tih butuni aš me glava boli!
Marija: Da, sada te glava boli, a ni te bolela noceska va "Rushu", celu noć si klavral zes onu mulariju i sada ti rečes da te glava boli, rekli bi stari, de šera leoni - de matina kojoni.
Tone: Ala ne budi ti sad litanije držala. Viš ga, lepe litanije udela onoh fra Tuba, njegova je vavek zadnja. Bogu hvala! Bogu hvala da je Tuba, Bogu hvala da je koncerti i Bogu hvala da je kulturnih veceri, i Bogu hvala da imamo i velo jaje do Božića a prežepjo imamo celo leto. za Božić samo novu šmreku nabandjera i sve je kako novo. Bogu hvala!
Marija: A viš ju naša Marina, i ona se s velim rilima slika na okol, lepe slike ima. Prepejala je Bernardića Orlec na karantenu šetimanu dan, na miru na instrukcije. Gjedaj, gjedaj ovdeka, anke je novi pop va Orlec prišal. Piše da je on s Paga prišal. I ovoh naš je s Paga prišal. Da da, oni dva su prijatelji na facebuku. Ma, prijateljica im je i ona nevestica do Marine. Viš i ona je do Paga, forši su svi skupa zes jenu kurijeru prišli..
Tone: Ma ne, to ćemo se mi bratimit s Pagom.
Marija: Trubilo, to će ti Marina udelat županiju sve dole do Paga.
Tone: Ma kede ti to sve gjedaš?
Marija: Sve ti piše na faceboku, Novi list, Otoci.net, niki više ne kupuje Novi list, sve ti je to online!
Tone: A sada ne moren nanke auto dobit na lutarije aš nema kuponi online.
Marija: Viš i naš šindako je vavek online, i njega se vidi na svakoj fotografiji, on se sad razume u bagere, vidiš ga na dizalici, i ceste zna delat i lampadine postavljat a voli se slikat i kraj kanali.
Tone: Da, aš kanali mu voli žena, ona ti je kustosica i tamo najde starine za pokle pokazat muzeju.
Marija: To su sve neki veli projekti, pelno soldi se tratilo na te kanali, dizalice, ringišpili i lampadine
Tone: Kakove lampadine, kakovi ringišpil?
Marija: Ce nisi videl onoh veli kružni tok, ona svetla po česte, kako da si va lunaparku. Gjedan sliki, ma tu se neš drugo dela.
Tone: To ti delaju veliki markat, jenu velu butigu.
Marija: A dio mio, "Cresanka" gre arimengo...
Tone: Videli su vraga, i udelat će velu mrežu okol kampa, kako jenu velu vršu, turisti će lahko poć nutra, ma nikako venka.
Marija: A da, svi soldi će zustat va vrše.
Tone: Ma nee, to ti je da ne gredu va grad aš je tamo veli kažin do muziki, aš turisti voliju mir.
Marija: Je, imaš prav. Va "Arsanu" šušura mužika amerikana tuta forca, ja ti vojim onu... (svira "I ain't your mamma)
Tone (digne se iz kreveta): A hebaj, a ja ti volim onu moju iz "Burina". (svira "Evo mene moji judi") Se spominjes onu do Hanke Paldum, nju moreš svaki dan cut va "Fortisu", se spominjes one... "Grlimo se, plešemo"?
Marija: A moj Tone, kada smo bili mladi kako nam je lepo bilo...
Tone: A ce je zes "Plavicu"? Tamo niš ne cujen...
Marija: A nećeš ni cut, aš su oni do Italje zvali da ne moru spat i tako da ti tamo muzika svira šoto voće...
Tone: Ovo leto je bila vela lepa fešta i niki ni nis govoril kad su do Rija prišli Žventula i Marenić.
Marija: Ma kakovi Žventula trubiloo, Fantela i Marenić, oni su lepo dobili medaju a kumpanija do Marenića je udelala takovu festu da Cres takovu ni videl.
Tone: Da da, se spametin, napil san se tu večer i zajedno s Marenićem plaval na fontani.
Marija: Je, napil si se ko prasec, a mladići su vero meritali ovakovi doček.
Tone: Ma sen cul da Cres ima pelno sportista, mladi do kosarki su vero pravi, onoh Jure ih je lepo stavil na red. On intanto već dvajset let igraju, i oni su udelali velu feštu, svi su imeli lepe maje, a i tajnica se obelkla va plavu i zuto.
Marija: Ce nisu to boje do Cresa?
Tone: Ona ti je prava Cresanka, zna taljanski, svugdje ju vidiš, malo je meštrica, malo je tajnica malo dijeli fjori, dela kolacici i to sve za nis.
Marija: Je, to su videli i ovi do venka pa je dobila nagradu za volontera godine!
Tone: Marija, hebaj, si se bila ti rastegnut malo na one sprave kol Svetog Mikule?
Marija: Bila san, bila. Ma bilo je preveć judi, svi se tamo rastežu i natežu. Ja san ti tamo videla i nonu Linu kako se rasteže na te makine!
Tone: Ona ti se sikuro pripravja za Igre bez granica. Ona ti se natječe u disciplini bacanje vode kroz puneštru, premještanje stolova iz šupljeg u prazno i borba z kamarijerima, jedan na jedan.
Marija: Ma kede ti to sve cujes?
Tone: Ne cujen ti ja već par let ali zato jos vidin...
Marija: Gjedan neke filmići na kompjuteru, ce delaju tamo kol "Elektrovodi"?
Tone: Tan ti delaju veli autobusni kolodvor. Bit će mesta za nasih kurjeri i onih do venka.
Marija: A kada bi to trebalo bit finjeno?
Tone: A prije izbora sikuro...
Marija: A znaci sada moran glasat za onog visokog, forši će i mene dat da kopam kanale i tražim zidići.
Tone: Ma sen čul da ovu zimu svi su šli va Zagreb gjedat nekakove lampadini?
Marija: Ma ke lampadini, ti si jena lampadina, svi su šli va Zagreb gjedat Advent! To da je nes jako lepa, ma da i pelno kušta.
Tone: Tar smo i mi onda imeli Advent na onoj novoj česte i ono pelno košta.
Marija: Ma ne, to su ti judi šli potrošit šoldi aš su ovo leto sila ulik pobrali i pelno uja šubito prodali.
Tone: Da, ovo leto smo imeli sila dela oko ulik, tri leta smo cekali da bi ovo leto brali...
Marija: Hebaj, gjedam tu slike na profilu od Lučke uprave da su udelali jedan lepi porat, porat je lep ma štorija još ni finjena. Tamo ti je jena lepa butega okol mesta za barku. Neki je dobil mesto a nema barku, a oni ki imaju barku ne moru zavezat. Ma to ti je štorija kako luterija na tanci. Neki ki je kupil tombolu ni dobil nagradu.
Tone: Ma ne, ja san bil tamo, ovi mladi su se malo smutili, oni su ti svi vežgani, svi va šaltu. Ma kasneje su svi dobili tombolu ki je imal.
Marija: Ma ja tu citan da je ona lepa voditeljica preko veze dala bičikletu jenoj prijateljice, a drugoj sliku do nasega Solisa..
Tone: Ma forši je i ona vežgana..
Marija: Ma i ti si bil neku večer vežgan na 6 ur.
Tone: Ma ce to govoris?
Marija: Se spominjes pred 15 dan kad ni bilo struji jeden dan, pa drugi, pa treti a ovi do "Elektroprimorja" nisu kapili kede je kvar.
Tone: A forši nisu videli aš je bilo škuro.
Marija: A se spametis kako je bilo kada je bilo skuro kad smo bili mlaji. Kako bi se lepo kalumali na pusteju... A, se spametis...?
Tone (dubokim glasom, uzbuđeno): Mmmmmmm, kako ne bin Marija moja... Si kričala kako jena prasica.
Marija: Tone ne budi tako, judi te slusaju!
Tone: Bem, almeno je bilo pelno dec.
Marija: Forši će sad bit pelno dec, mladi su se oženili, struja je delala škerci, kako nekad...
Tone: A viš, forsi je i Spalanicu bilo skuro pa je dobil sina.
Marija: Maja moja ce je ovo. Sve se zaškurilo. Sve mi se blokalo.
Tone: Forši opet struja dela škerci... Mmmmmmm...
Marija: Trubilo, ni do struji, venka delaju lampadine. Ovo je kompjuter partil. Ajmeeee mene... Kako ću sad facebook gjedat.
Tone: I kako ćemo sada Novi list lejit?
Marija: I profili do judi gjedat??
Tone: Ja ti se u tu tehniku ne kapin, ćemo trebat zvat vnuki da nam to udelaju.
Marija: Almeno sada ćemo forši malo više ćakulat mi dva, a ne žbalit na ovoh ekran.
Tone: Se spominješ Marija, kako smo po vecer ćakulali i lepe kanconi kantali, kumpanija bi prišla i do kesno va noć svi se skupa divertili. A kada bi svi šli ća, mi dva bi se va posteje stisnuli i onda bi luče delala škerci a madrac bi škripal kako škripanica va korizme.
Marija: Imaš prav... Lepa su to bila leta! Ala rini se malo na bandu da ja pridem kol tebe... Pa ćemo malo ćakulat kako nekad.
Tone: Hodi, hodi, namesti se... Tako, tako! Mmmmmmmm...
Marija (Skoči iz kreveta, naglo): A Pusta zapalit!?
Tone: Zovi ga kako ćeš, tar se moj Pust već važgal!!
Marija: Prasec!!